Ný forysta framsóknar gæti trekkt að

Líklegt er að ný forysta Framsóknarflokksins geti orðið til þess að kjósendur gefi flokknum frekar tækifæri. Þetta segir Einar Mar Þórðararson stjórnmálafræðingur og að forystuskiptin í Framsóknarflokknum geti aukið þrýsting á hina flokkana að skipta um forystu.

Einar segir flokkinn hafa sent mjög skýr skilaboð með forystubreytingunni. Krafan hafi verið sterk í flokknum, líkt og í samfélaginu, að gerðar séu algjörar breytingar og að nýir tímar taki við. Hann telur að ný forysta komi til með að hafa talsverð áhrif á flokkinn. Líklegt sé að kjósendur vilji frekar gefa flokknum tækifæri en fylgi flokksins hefur mælst lítið í könnunum undanfarið.

Einar telur einnig að niðurstaðan af landsfundi Framsóknarmanna geti aukið þrýstin á forystu annarra flokka að víkja. Raddir sem vilji breytingar á forystunni kunna að verða háværari.