Innbrotum fækkað eftir að pólskt þjófagengi var handtekið

Innbrotum á höfuðborgarsvæðinu hefur snarfækkað frá því lögreglan handtók pólskt þjófagengi sem grunað er um að hafa staðið á bak við hundruð innbrota undanfarna mánuði. Gæsluvarðhaldi yfir mönnunum var framlengt í dag.

Á fimmtudaginn í síðustu viku handtók lögreglan fimm einstaklinga, fjóra karlmenn og eina konu. Þrír voru gripnir við innbrot en tvö til viðbótar, karlmaður og kona voru handtekinn eftir að hafa reynt að koma þýfi í verð hjá skartgripasala í borginni.

Fimmmenningarnir sem allir eru pólskir ríkisborgarar eru grunaðir um að hafa stundað innbrot með skipulögðum hætti á höfuðboragarsvæðinu undanfarnar vikur, og verið afar afkastamikilir.

Pólverjarnir hafa setið í gæsluvarðhaldi síðan þeir voru handtekinn en rannsókn lögreglu á málinu miðar vel á afram. Lögreglan hefur undanfarna daga framkvæmt húsleitir víðs vegar um borgina og fundið þýfi úr tugum innbrota. Nú er unnið að því að tengja þýfið við innbrotin svo það rati aftur til eigenda sinna. Samkvæmt heimildum fréttastofu er ekki útilokað að meira þýfi finnist.

Þá segja sömu heimildir að nýjasta afbrotatölfræði lögreglunnar sýni fram á að innbrotum hefur snarfækkað á höfuðborgarsvæðinu eftir að þjófagengið var handtekið en það rennir stoðum undir þær grunsemdir lögerglu að gengið hafi átt stóran þátt í þeirra miklu innbrotaöldu sem skall á höfuðborgarbúum fyrir fáeinum mánuðum.

Gæsluvarðhald yfir fimmmenningunum átti að renna út í dag en héraðsdómur féllst á að framlengja því um eina vikur.