Menntamál ekki í forgrunni hjá þessari ríkisstjórn

Í dag fór fram útskrift frá Háskólanum á Bifröst. Alls voru 115 nemendur brautskráðir, þar af 29 með meistaragráðu.

Í ræðu rektors Ágústs Einarssonar við útskriftina kom m.a. fram að menntamál eru ekki í forgrunni hjá þessari ríkisstjórn frekar en hjá þeim fyrri. Í stöðugleikasáttamála aðila vinnumarkaðarins frá því í vor koma orðin menntun og skóli ekki fyrir og segir það sína sögu.

Rektor telur fámennið hérlendis helstu orsök vandamála okkar núna. Við eru of fámenn til að manna þá innviði og stofnanir sem þarf í nútíma þjóðfélagi. Fámennið er einnig eitt helsta vandamálið við að komast út úr þessum erfiðleikum. Íslendingar eru þjóð sem þjáist af ofmetnaði og telur hún sig ákaflega merkilega en hún er það ekki.

Rektor vill að þeir sem hafa hneppt börn þessa lands í skuldafjötra verði dæmdir bæði eftir lögum og siðferðismati þjóðarinnar og ábyrgð þeirra á mesta kerfishruni Íslandssögunnar mun aldrei gleymast. Þeir hafa enga afsökun og rektor gefur ekkert fyrir afsökunarbeiðni þeirra.

Ágúst greindi frá góðri stöðu Háskólans á Bifröst, bæði í rekstri og í könnunum. Áform um að stofna nýjan háskóla með Háskólanum á Bifröst, Listaháskóla Íslands og Háskólanum í Reykjavík hafa verið lögð á hilluna vegna andstöðu stjórnar Listaháskólans. Engar sameiningar eru því á döfinni hvað varðar Háskólann á Bifröst.

Þetta kemur fram í tilkynningu frá Háskólanum á Bifröst.