Úttekt á máli Gunnars verður að vera hafin yfir allan vafa

Guðríður Arnardóttir, oddviti Samfylkingarinnar í Kópavogi, segir að úttekt á viðskiptum Kópavogsbæjar við dóttur Gunnars Birgissonar, bæjarstjóra, verði að vera hafin yfir allan vafa. Þess vegna hafi Samfylkingin lagt til að endurskoðendafyrirtæki færi yfir málið.

Bæjarstjórn Kópavogs samþykkti í dag einróma tillögu Samfylkingarinnar að endurskoðandi bæjarins færi ekki með rannsókn á um 50 milljóna króna greiðslum til fyrirtækis í eigu dóttur Gunnars heldur endurskoðendafyrirtækið Deloitte. Gunnar vék af fundinum við afgreiðslu tillögunnar.

Áður hafði Samfylkingin lagt til að endurskoðandi bæjarins gerði úttektina. Guðríður segir að í ljósi umræðunnar hafi verið eðlilegt að fá utanaðkomandi aðila til að fara yfir málið.

Treystir endurskoðendum Kópavogsbæjar

„Það er mikilvægt að það komi fram að ég treysti endurskoðendum bæjarins hér eftir sem hingað til að vinna vinnuna sína af fagmennsku og heiðarleika. En það er mikilvægt að komast til botns í málinu og úttektin sé hafin yfir allan vafa," segir oddvitinn.

Vinnu við úttektina verði hraðað

Guðríður segir að nú verði beðið eftir niðurstöðu endurskoðendafyrirtækisins.

„Það er búið að óska eindregið eftir því að þessari vinnu verði hraðað eins og kostur er. Við erum að vona að þetta muni ekki taka nema nokkra daga og úttektin verði tilbúin í næstu viku."