Bæjarstjóradóttirin tók fúlgur fjár fyrir vinnu sína

Fyrirtæki dóttur bæjarstjórans í Kópavogi rukkaði allt að fjórfalt gangverð fyrir umbrot og hönnun á afmælisriti bæjarins fyrir fjórum árum, að mati auglýsingastofu í Reykjavík. Umfangsmikil viðskipti bæjarins við dóttur bæjarstjórans eru í hæsta máta óeðlileg segir fyrrverandi bæjarstjóri í Kópavogi.

Útgáfufélagið Frjáls miðlun er í eigu dóttur og tengdasonar Gunnars I. Birgissonar bæjarstjóra í Kópavogi og er það með aðsetur á heimili þeirra hjóna. Eins og fram hefur komið í fréttum hefur Frjáls miðlun fengið rúma fimmtíu og eina milljón króna á síðustu níu árum frá Kópavogsbæ fyrir meðal annars ljósmyndir, vinnu við gagnvirkt götukort, hönnun og gerð umverfisviðurkenninga, power point kynningar, hönnun á ársskýrslum og afmælisriti bæjarins - sem átti að koma út í tilefni af 50 ára afmæli Kópavogs árið 2005 en gerði það ekki. Hansína Ásta Björgvinsdóttir tók við bæjarstjórn Kópavogs eftir andlát Sigurðar Geirdal árið 2004. Hún undraðist það í samtali við fréttastofu í dag hvað Kópavogsbær hefði haft mikil viðskipti við dóttur bæjarstjórans og sagði það í hæsta máta óeðlilegt.

Alls fékk Frjáls miðlun rúmar 3,4 milljónir króna fyrir að útvega ljósmyndir, hanna og brjóta um afmælisritið á árunum 2004 og 2005 og lauk það sínum hluta verksins að sögn upplýsingafulltrúa Kópavogs. Textasmíð var ekki í höndum dóttur Gunnars, hann kláraðist hins vegar ekki og því er handritið ennþá í próförk á bæjarskrifstofum Kópavogs.

Fréttastofa leitaði til auglýsingastofu í Reykjavík sem hefur öllu meiri umsvif en Frjáls miðlun en er þó ekki ein af stærstu og dýrustu auglýsingastofunum. Að mati þeirrar stofu hefði þótt gott að fá sex hundruð þúsund og upp í eina milljón króna á þessum tíma fyrir verk af þessum toga. Þetta hlýtur að vera eitthvert dýrasta rit sem ég hef heyrt um, sagði framkvæmdastjóri stofunnar við fréttastofu.

Bjarni Benediktsson, formaður Sjálfstæðisflokksins, sagðist í samtali við fréttastofu í dag ekki hafa forsendur til að meta umfangsmikla verkefnavinnu dóttur bæjarstjórans við Kópavog - hann myndi því ekki tjá sig um þetta mál fyrr en niðurstöður koma frá endurskoðun Kópavogsbæjar.