Ökufantur iðrast innilega

„Það er náttúrulega hrikalegt hvernig fór þennan dag," segir 35 ára ökumaður sem handtekinn var fyrir viku eftir að hafa keyrt á slökkvistöðina við Skógarhlíð og fjölda bíla. Maðurinn losnaði úr gæsluvarðahaldi í gær.

„Ég er fjölskyldumaður og vinn allan daginn," segir hann. „Ég hef aldrei hugsað mér að valda einum eða neinum skaða á nokkurn hátt og þess vegna er ég alveg í sjokki yfir því sem gerðist."

Ætlar í meðferð sem fyrst

Maðurinn segist hafa setið að drykkju yfir daginn og hann hafi verið orðinn ölvaður þegar hann lagði upp í bílferðina. Hann er niðurbrotinn eftir atburði síðustu viku og segist ætla að leita sér aðstoðar um leið og hann getur.

„Ég er búinn að vera í drykkju undanfarið, en engri óreglu samt. Ég var búinn að losa mig undan því fyrir mörgum árum. Það brotnaði bara eitthvað inni í mér þetta kvöld."

„Ég er vonandi á leiðinni í meðferð á morgun eða um leið og ég kemst að. Ég ætla að reyna að ná hausnum á mér í lag."

Maðurinn segist ekki reiðubúinn að vera nafngreindur strax, en útilokar ekki að segja sögu sína undir nafni þegar hann hefur lokið við áfengismeðferð.

Ætlaði aldrei að meiða neinn

Hann segir farir sínar af lögreglunni ekki sléttar. Hann hafi verið gripinn með gras, og eftir það hafi lögregla áreitt hann og neitað að veita honum þá þjónustu sem hann þarfnaðist.

„Ég er samt í raun og veru ekkert reiður út í lögregluna. Ég er bara sár út í það að geta ekki ætlast til að fá þjónustu frá þessari stofnun."

Maðurinn segir að sunnudagskvöldið örlagaríka hafi hann orðið var við að einhver var óboðinn að róta í bátnum hans og haft samband við Neyðarlínu. Neyðarlínan hafi hins vegar skellt á hann. Hann hafi þá ákveðið að grípa til sinna ráða.

Iðrast innilega

„Ég vissi ekkert hvað ég ætlaði að gera. Ég ætlaði bara að fara niður í fjarskiptamiðstöð og láta heyra í mér."

„Ég held að ég hafi aldrei ætlað að slasa eða meiða neinn þó ég hafi látið þung orð falla. Ég var nú meira bara að láta vita hvernig mér leið."

Maðurinn átti samtal við fréttamann umrætt kvöld og sagðist þá ætla að skaða lögreglumenn. Hann segist þó ekki hafa verið með sjálfum sér þegar á símtalinu stóð. Nú iðrast hann bílferðarinnar af öllu hjarta.

„Þetta er óafsakanlegt með öllu að mínu mati. Að stofna fólki svona í hættu. Það er alveg sama út á hvað ég hef að setja, það er engin afsökun fyrir hegðun minni."