121 námsmenn enn á atvinnuleysisskrá

Vinnumálastofnun hefur sent bréf til 121 manns sem er bæði á atvinnuleysisskrá og skráður í nám án þess að hafa samið um það við stofnunina. Undanfarna daga hefur verið unnið að því að samkeyra atvinnuleysisskrána við nemendaskrár fjörutíu og þriggja háskóla og framhaldsskóla í landinu.

Til þess að atvinnulausir megi vera í námi án þess að missa rétt til bóta þurfa þeir að semja skriflega við Vinnumálastofnun. Fullt nám er ekki heimilað en það er hluti af svokölluðum vinnumarkaðsúrræðum fyrir atvinnulausa að þeir geti stundað hlutanám, samhliða atvinnuleit. Baldur Aðalsteinsson, verkefnisstjóri hjá Vinnumálastofnun, segir að mun fleiri nöfn hafi komið í ljós við samkeyrsluna. Langflestir hafi hins vegar verið með svokallaðan námssamning við stofnunina og því í fullum rétti.

Baldur segir að í námssamningum sé yfirleitt miðað við 33 prósenta nám sem hámark, en reglurnar eru nokkuð matskenndar og sveigjanlegar. Algengt er að fólk sæki 1-2 námskeið í háskóla eða kvöldskóla án þess að það skerði bætur.

Samkeyrslunni er aðeins lokið að hluta. Baldur segir ljóst að mun fleiri mál eigi eftir að koma upp. „Við setjum okkur í samband við þessa einstaklinga og fáum hjá þeim úrskýringar á þessu. Í kjölfarið munu væntanlega einhverjir detta af atvinnuleysisskránni en þessi stjórnsýsla er tímafrek. Það munu líða vikur þangað til við vitum hvað það eru í raun og veru margir sem hafa verið að reyna að fá bætur með fullu námi.“

Eins og Fréttablaðið sagði frá 14. september voru 345 háskólastúdentar í lánshæfu námi skráðir atvinnulausir á síðasta skólaári og þáðu atvinnuleysisbætur sem þeir áttu ekki rétt á. 15. september lá fyrir að 135 voru án námssamninga. Gissur Pétursson, forstjóri Vinnumálastofnunar, segir að óvíst sé til hvaða aðgerða verður gripið til viðbótar gagnvart þeim hópi. Reglugerð þar sem skýrt var kveðið á um að ekki mætti stunda lán á bótum var ekki sett fyrr en í janúar á þessu ári, eftir að kennsla hófst á vormisserinu. Margir úr þeim hópi hafi því haft einhverjar málsbætur og óvíst um þýðingu þess að fara í frekari aðgerðir.

Stofnunin einbeiti sér að því að hafa eftirlit með þeim sem eru skráðir í nám á þessu skólaári enda sé grundvöllur fyrir eftirlitsaðgerðum nú mun traustari en áður.