Albert: Vonum að bæti í vindinn

Albert Sævarsson, markvörður ÍBV, verður á kunnuglegum slóðum í kvöld þegar ÍBV sækir hans gamla félag, Grindavík, heim.

„Þetta er nú bara eins og hver annar leikur fyrir mig. Ég hef spilað áður gegn Grindavík og það venst. En vissulega er samt aðeins meiri fiðringur fyrir þessa leiki en aðra," sagði Albert sem kom til Grindavíkur í gær.

„Það verður bara góð stemning í kvöld. Það eru engin leiðindi þó svo ég spili fyrir annað félag núna. Hér í Grindavík þekkja allir alla og eru vinir," sagði Albert jákvæður.

Veðrið í Grindavík núna er með besta móti, rjómablíða og logn. Ekki beint kjöraðstæður fyrir þessi tvö félög sem kunna svo sannarlega að spila í vindi.

„Hann á nú að blása í kvöld eða nótt. Við vonum að það fari að bæta í vindinn fljótlega því við erum helvíti góðir í roki," sagði Albert léttur.