Albert fékk líklega heilahristing

Ljótt atvik varð undir lok leiks Grindavíkur og ÍBV í kvöld. Þá skullu Albert Sævarsson, markvörður ÍBV, og Gilles Ondo, framherji Grindavíkur, saman.

Albert lá eftir óvígur með skurð á höfðinu. Hann var þess utan ringlaður og virtist hafa fengið heilahristing.

Erlendur Eiríksson dómari gaf Alberti drjúgan tíma til að jafna sig og hann kláraði að lokum leikinn en Andri Ólafsson var klár í að stíga í markið um tíma.

Eftir leik vildi Albert ekki sinna boðum læknis um að fara í skoðun á sjúkrahúsið og þurfti Heimir Hallgrímsson, þjálfari ÍBV, að koma til skjalanna og skikka Albert til þess að fara.

Tveir aðrir leikmenn ÍBV fengu skurð í leiknum og svo meiddist Þórarinn Valdimarsson og er óttast að hann spili ekki meira í sumar.