Mótmælendur deyja í Íran

Ríkissjónvarpsstöðin í Íran greindi frá því í gær að þrettán hefðu látist í átökum mótmælenda og óeirðalögreglu í gær í miðborg Teheran í Íran. Fréttastofur á borð við CNN segja þó að tala látinna sé mun hærri.

Mótmælaaðgerðirnar í gær áttu sér stað þrátt fyrir bann stjórnvalda. Foringi írönsku lögreglunnar sendi leiðtoga stjórnarandstöðunnar í Íran, Mirhossein Mousavi, viðvörunarbréf í dag þar sem fram kemur að lögreglan muni mæta mótmælendum af enn meiri festu komi til frekari mótmæla vegna úrslita forsetakosninga í landinu.

Byltingarráðið í Íran tilkynnti í gær að tíu prósent atkvæða í kosningunum yrðu endurtalin. Markmiðið með því er að róa mótmælendur. Fréttir af mótmælunum í gær eru misjafnar og margar óljósar, enda fá erlendir fjölmiðlar ekki að mynda mótmælin. Myndskeið sem birt voru í gær, og koma frá írönskum almenningi, sýndu lögreglu beita táragasi, vatnsbyssum og kylfum gegn mótmælendum í Teheran.