Tvær konur hæfari en bæjarfulltrúi Samfylkingarinnar

Tvær konur voru hæfari en bæjarfulltrúinn Garðar Páll Vignisson til þess að gegna starfi skólastjóra við Hópsskóla í Grindavík. Þetta kemur fram í fundargerð Fræðslu- og uppeldisnefndar Grindarvíkurbæjar.

Meirihlutasamstafi Samfylkingarinnar og Framsóknarflokksins lauk formlega í gær með bréfi sem Framsókn sendi Samfylkingunni. Ástæðan var meðal annars djúpstæður ágreiningur um það hver ætti að fá starf skólastjóra við Hópsskóla.

Bæjarfulltrúi Samfylkingarinnar, Garðar Páll, sem er að auki forseti bæjarstjórnar, sótti um starfið. Samfylkingin bókaði á fundi bæjarstjórnar að hann ætti að fá starfið. Þessu var Framsókn ósammála.

Á fundi Fræðslu- og uppeldisnefndar þann sjötta apríl kemur fram að í samræmi við greinagerð Capacent um úttekt á hæfi umsækjanda, þá hafi Maggý Hrönn Hermannsdóttir og Soffía Vagnsdóttir verið hæfastar í starfið. Þar af leiðandi eftirláti nefndin bæjarstjórn að velja aðra hvora í starfið.

Samfylkingin bókar aftur á móti á fundi Fræðslu- og uppeldisnefndar að Garðar Páll sé fyllilega hæfur í starfið samkvæmt greinargerð fagaðilans, sem er Capacent. Þá segir ennfremur í bókun Samfylkingarinnar að það samræmist starfsmannastefnu Grindavíkurbæjar að ráða hann í starfið.

Ekki náðist í Soffíu þrátt fyrir ítrekaðar tilraunir en hún kom ekki til greina í starfið samkvæmt fundargerð bæjarstjórnar en Framsókn mældi með Maggý Hrönn í starfið á meðan Samfylkingin vildi Garðar Pál.

Nú er meirihutinn sprunginn vegna málsins en bæjarfulltrúar Framsóknar og Sjálfstæðismanna munu funda síðdegis um hugsanlegt samstarf flokkanna.