Meirihlutaslit: Svekkjandi ef þetta endar svona

„Mér finnst það fulllangt gengið í pólitísku harki að menn fái ekki að sækja um störf," segir Garðar Páll Vignisson, bæjarfulltrúi Samfylkingarinnar í Grindavík og forseti bæjarstjórnar. Framsóknarmenn slitu formlega samstarfi flokkanna með bréfi sem þeir sendu Samfylkingunni í gær.

Ástæðan var meðal annars djúpstæður ágreiningur um ráðningu í skólastjórastöðu Hópsskóla. Meðal umsækjanda var Garðar Páll sjálfur en Samfylkingin lagði fram bókun á síðasta fundi bæjarstjórnar þar sem hún lagði til að hann yrði ráðinn til starfsins. Þessu voru Framsóknarmenn ósammála og lögðu sjálfir fram bókun. Þeir vildu að Maggý Hrönn Hermannsdóttir yrði ráðinn.

Capacent hafði komist að þeirri niðurstöðu að bæði Maggý og Garðar Páll væru hæf til starfsins. Í bókun Framsóknarmanna kemur fram að Capacent hafi álitið Maggý hæfari í starfið.

Aðspurður hvort Garðar Páll telji það ekki óeðlilegt að forseti bæjarstjórnar sé ráðinn í starf skólastjóra bæjarins svarar hann: „Nei, ég sé eiginlega ekkert að því enda er það þannig að þessi orðaleikur um pólitískar ráðningar er skrýtinn. Menn þurfa fjögur atkvæði til þess að vera ráðinn."

Þess má geta að Samfylkingin hefur tvo bæjarfulltrúar og þurftu því samþykki Framsóknar í málinu.

Garðar Páll segir að í lýðræðislegu samfélagi séu hæfustu mennirnir ráðnir. Spurður hvort Capacent hafi ekki einmitt komist að því að Maggý væri hæfari til starfsins, svarar Garðar því til að hann sé ekki sammála því. Hann bendir á að Capacent hafi ekki heldur mælt sérstaklega með neinum þeirra sem voru taldir hæfir. En það sé rétt að hún hafi verið metinn hæfari en hann af Capacent.

„Stöðuveitingar eru alltaf erfiðar, tengslin liggja víða og sitt sýnist hverjum," segir Garðar Páll en hann heldur því fram að Framsóknarflokkurinn hafi krafist þess að hann drægi umsókn sína til baka. Hann segir málið farsa og ef upp úr slitni þá sé hann miður sín. Spurður hvort samstarfinu sé ekki endanlega slitið, segist hann ekki telja svo. Enn sé verið að ræða við Framsóknarflokkinn um áframhaldandi samstarf.

„Við erum búinn að vinna flotta hluti og það væri svekkjandi ef þetta endaði svona," segir Garðar Páll að lokum.

Sjálfstæðismenn og Framsóknarmenn munu funda síðdegis um hugsanlegt meirihlutasamstarf. Það yrði þá þriðja samstarfið sem kæmist á frá kosningum árið 2006.