Týndi símanum og sogaðist inn í sakamál

„Ég týndi símanum mínum í bænum. Svo fór fólk að fá einhver skringileg SMS úr símanum mínum. Á sunnudagsnóttina var síðan farið að áreita einhverja hátt setta menn," segir Gyða Björg Sigurðardóttir, tvítugur Reykvíkingur.

Hún varð fyrir því óláni að týna símanum sínum um síðustu helgi. Í vikunni fékk Gyða svo símhringingu frá lögreglunni þar sem henni var tilkynnt að hún hefði stöðu grunaðs í sakamáli eftir að síminn hennar hafði verið notaður til að hóta fólki. Hún var í kjölfarið boðuð í skýrslutöku.

„Þeir spurðu mig hvort ég væri að standa í einhverjum hótunum. Ég svaraði því neitandi og útskýrði bara hvað hafði gerst, enda nota ég ekki slíkar aðferðir til að koma skoðunum mínum á framfæri," segir Gyða.

Gyða segist ekki vita nákvæmlega hvað hinir óprúttnu aðilar sögðu í símann, en telur að hringt hafi verið í forstjóra íslenskra fyrirtækja. Hún telur að atvikið hafi greinilega blandast inn í umfangsmeiri rannsókn lögreglu. Gyða segir lögreglu þó hafa sýnt málinu skilning.

„Ég var mjög fegin hvernig þetta gekk upp. Mér var mjög brugðið þegar löggan hringdi í mig - þetta var of lygilegt til að vera satt," segir Gyða, sem nú hefur látið loka gamla símkortinu og vonar að málinu sé þar með lokið.