Gummi Ben: Varnarleikurinn til skammar

Guðmundur Benediktsson, sóknarmaður KR, segir að Fylkir hafi átt stigin þrjú skilin í kvöld. Árbæingar unnu 4-2 sigur í Vesturbænum eftir markalausan fyrri hálfleik.

„Helstu vonbrigðin eru þau að við spiluðum ekki eins og menn. Við fáum á okkur fjögur mörk á heimavelli og það ekki í fyrsta sinn í sumar. Það finnst mér til skammar. Við eigum að vinna alla okkar heimaleiki og það gerist ekki með því að fá á sig fjögur mörk."

KR-ingar voru betra liðið í fyrri hálfleiknum en tókst ekki að skora. Fylkismenn skoruðu tvö mörk snemma í seinni hálfleiknum. „Við sýndum karakter með því að koma til baka en svo duttum við aftur í sama farið. Varnarleikurinn okkar í dag var til skammar. Þá er ég ekki bara að tala um varnarmennina heldur allt liðið," sagði Guðmundur.

„Fylkir er bara með þannig lið að ef þú gefur þeim svona færi þá refsa þeir. Við vorum galopnir og þeir eru með fljóta menn fram á við. Þeir áttu svo sannarlega skilið að vinna þennan leik," sagði Guðmundur.

KR vann frábæran sigur gegn FH í síðustu umferð en hið skemmtilega Fylkislið skaut þeim niður á jörðina í kvöld. „Mér finnst ótrúlegt að menn hafi ekki lært af því að gefa þessi mörk gegn FH. Við sluppum fyrir horn þar en unnum samt sem áður sigur. Það er ekki hægt að gefa mörk í hverri umferð og ætlast til þess að við vinnum. Við áttum bara ekkert skilið í dag," sagði Guðmundur.