Atli Eðvalds: Þetta var búið eftir korter

Atli Eðvaldsson mætti hundfúll í viðtal eftir leikinn og var allt annað en sáttur með sína menn eftir þrjú núll tap gegn Breiðablik.

"Eftir korter, þá var leikurinn búinn. Menn voru langt frá því að gera það sem við ætluðum að gera og við höfðum ekki getu til þess að snúa þessu við," sagði Atli og hrósaði liði Breiðabliks fyrir frammistöðuna.

"Þeir eru með mjög gott lið og við vissum það. Þeir spila fínan fótbolta og eru í góðu standi, þeir voru miklu betri en við í dag."

Atli Eðvaldsson tók Marel Baldvinsson útaf í hálfleik og setti Baldur Bett inn á. Hann breytti þá úr 4-4-2 í 4-5-1 með Helga einan frammi. Aðspurður hvort hann hefði gert þá breytingu of seint sagði Atli:

"Alls ekki. Við höfum engu að tapa og ég vil spila 4-4-2 og við eigum að leysa þetta og höfum gert það í mörgum leikjum í sumar. Þetta voru þrjár fyrirgjafir og boltinn var þrisvar í netinu. Þegar menn eru ekki að dekka inni í teig þá fáum við á okkur mörk."