Steingrímur ræsti Reykjavíkurmaraþonið

Reykjavíkurmaraþonið var ræst í Lækjargötu klukkan tuttugu mínútur í níu í morgun. Metþáttaka er í hlaupinu. Fleiri en ellefu þúsund þátttakendur höfðu skráð sig í hlaup í dag, þar af 670 manns í heilt maraþon.

Fyrstir lögðu af stað hlauparar í maraþoni og hálfmaraþoni, en það voru þau Steingrímur J. Sigfússon, fjármálaráðherra, og Ragnhildur Steinunn Jónsdóttir, sjónvarpskona sem ræstu hlaupið.

Þá eru einnig þúsundir manns sem ætla að taka þátt í tíu kílómetra hlaupinu eða þriggja kílómetra hlaupinu, en flestar eru þó skráningarnar í Latabæjarhlaupið, sem er fyrir níu ára og yngri.

Latabæjarhlaupið hefst um tuttugu mínútur fyrir eitt í dag í Hljómskálagarðinum með upphitun Íþróttaálfsins og Sollu stirðu. Hægt er að skrá börn í hlaupið frá hádegi í tjaldi í Hljómskálagarðinum.

Einhver truflun kann að verða á umferð vegna hlaupsins, en nánari upplýsingar um lokun gatna má nálgast hér.