Byr vill leysa erlenda tékkamálið

„Almenna reglan er að selja ekki erlenda tékka nema okkar viðskiptavinum. Við leitum þó allra leiða til að aðstoða fólki með slík mál og erum tilbúin að skoða hvert mál fyrir sig," segir markaðsfulltrúi Byrs, Salóme Rúnarsdóttir, varðandi vandkvæði Kanadafara sem vilja fá erlenda tékka þannig þeir geti borgað umsýslugjald vegna atvinnuleyfis út í Kanada.

Vísir sagði fyrr í dag frá máli Finns Torfa Þorgeirssonar sem hefur reynt án árangurs að fá erlendan tékka til þess að greiða 150 dollara umsýslugjald sem þarf að borga vilji Íslendingar fá atvinnuleyfi í landinu. Hann fékk þau svör hjá sendiráði Kanada að tékkana væri hægt að nálgast í Byr og SPRON en báðir bankarnir hafa þá reglu að gefa ekki þá ekki út nema til viðskiptavina sinna.

Ástæðan er meðal annars misferli sem hefur komið upp varðandi tékkana, þó í því sé engin dómur fólgin yfir þeim einstaklingum sem sækjast almennt eftir þeim. Án tékkanna er hinsvegar ekki hægt að fá atvinnuleyfi í Kanada, og því setur málið þann fjölda sem hyggst flytja til landsins í vonda stöðu. Þess má geta að hundruði manna sóttu kynningarfund um málið í Kennaraháskólanum í síðustu viku.

Finnur sagðist jafnframt hafa fengið þau svör hjá Byr að fleiri einstaklingum, í sömu erindagjörðum og hann, hefði verið vísað frá af þessari ástæðu. Þá er illmögulegt að nálgast slíka tékka í stóru viðskiptabönkunum sem hafa verið þjóðnýttir.

„Varðandi þetta ákveðna mál, þá þekki ég ekki alveg forsögu þess en ég hvet viðkomandi aðila til að hafa samband við okkur aftur þannig að við getum farið yfir málið með honum," segi Salóme og bendir á að hvert tilfelli sé skoðað fyrir sig og þau séu tilbúin að finna lausnir í tékkamálinu.

Samkvæmt tilkynningu sem barst frá kanadíska sendiráðinu þá er ekki hægt að greiða umsýslugjaldið með reiðufé, né öðrum gjaldmiðlum en breskum pundum og kanadískum dollurum.

Þá vill sendiherra Kanada, Anna Blauveldt, koma því á framfæri að sendiráðið hafi ekki tekið afstöðu til trúverðugleika bankanna, en í fyrri greininni sagði Finnur Torfi að kanadíska sendiráðið hefði bent honum á að nálgast tékkana hjá SPRON og Byr vegna ærumissis viðskiptabankanna þriggja eftir bankahrun.

Samkvæmt upplýsingum sem Vísir fékk hjá Kaupþingi þá er bankinn með virka greiðslumiðlun og getur gefið út erlendan tékka fyrir þá sem vilja borga umsýslugjöld í Kanada.

Þá vill Kaupþing einnig koma því á framfæri að bankinn er tilbúinn að aðstoða Finn Torfa vegna málsins en fulltrúi frá bankanum hafði samband við hann fyrr í dag. Þá má benda fleiri einstaklingum sem íhuga að fara til Kanada að vinna að hægt er að fá aðstoð í útibúum Kaupþings vegna erlendra tékka.

Þegar haft var samband við Finn var hann þakklátur fyrir viðbrögðin.