Jóhanna Sigurðardóttir forsætisráðherra frestaði þinghaldi í dag klukkan 11:51 að loknum umræðum og atkvæðagreiðslu um Icesave og önnur mál.
Las Jóhanna upp bréf frá forseta Íslands, en hann veitir forsætisráðherra umboð til að fresta þingi. Í bréfinu komu einnig fram heillaóskir forseta til handa þingmönnum, starfsmönnum Alþingis og landsmönnum öllum.
Þinghaldi er frestað til 1. október og fá þingmenn því langþráð frí, en sumarþing eru ekki alvanaleg. Þingmenn hafa þurft að glíma við stór mál í sumar, þeirra á meðal umsókn um Evrópusambandsaðild og Icesave samningana sem afgreiddir voru í dag.
