Norðmenn óttast vanskapaða risaþorska

Norskir fiskimenn eru óttaslegnir vegna vanskapaðra risaþorska sem hafa verið að koma í net þeirra í Lyngenfirði undan Tromsö.

Kjaftur þorskanna er afmyndaður þeir hafa stóran hnúð á hnakkanum og þeir eru óeðlilega feitir. Fiskimennirnir vilja rekja þetta til þorskeldisstöðvar sem er innarlega í firðinum.

Fiskistofa Noregs hefur málið til rannsóknar. Gunnar Trulssen svæðisstjóri stofnunarinnar í Norður-Noregi segir að margir vanskapaðir þorskar hafi veiðst í Lyngen í haust og Hafró leggi mikla áherslu á að finna orsökina.

Þorskarnir hafa verið sendir til rannsóknar og Terje van der Meeren rannsóknarstjóri segir að að minnsta kosti tveir þeirra beri merki um að þeir hafi verið klaktir út í kerjum og fóðraðir á smáu dýrasvifi sem einnig sé ræktað.

Framkvæmdastjóri þorskeldisstöðvarinnar er hinsvegar viss um að skrímslin komi ekki úr hans kvíum. Þeir sjái afar sjaldan vanskapaða fiska þegar þeir slátri fyrir markað.