Samkomutjaldið féll að lögreglu ásjáandi

„Hver vill bera ábyrgð á óhappi og manntjóni? Það getur hæglega orðið hér eins og erlendis,“ segir Magnús Sædal byggingarfulltrúi, sem í gær lét fella stórt samkomutjald í garðinum við Hressingarskálann í Austurstræti.

Magnús hafði boðað komu sína í Hressingarskálann klukkan tíu og mætti þá. Daginn áður höfðu eigendur staðarins vísað frá verktaka sem sendur var til að fella tjaldið. Tjaldið var sett upp í október og segjast eigendurnir hafa hugsað það sem aukasal fyrir ýmsar sjálfstæðar uppákomur. Slökkvilið sagði hættu kunna af skapast í tjaldinu og byggingarfulltrúinn benti á að nauðsynleg leyfi skorti en eigendurnir neituðu að verða við tilmælum um að fella tjaldið.

Vinnuflokki byggingarfulltrúa var synjað um aðgang að veitingastaðnum til að komast í garðinn. „Við hleyptum reyndar byggingarfulltrúanum sjálfum inn en svo vildi hann ekki fara út aftur fyrr en lögreglan kom og talaði hann til,“ segir Einar Sturla Möinichen, annar tveggja eigenda Hressingarskálans.

Ákvörðun byggingarfulltrúa um niðurrif tjaldsins hafði verið kærð til úrskurðarnefndar skipulags- og byggingarmála. Samkvæmt bráðabirgðaúrskurði, sem barst frá nefndinni eftir að byggingarfulltrúi mætti á staðinn, voru aðgerðir hans ekki stöðvaðar þar sem mögulegir almannahagsmunir vægju þyngra en hagsmunir eigendanna. Einar segir að þá hafi eigendurnir ekki sett sig upp á móti því að tjaldið yrði fellt. Þeir hafi þó ekki viljað auðvelda verkið með því að hleypa vinnuflokkunum í gegnum staðinn. „Þeir tóku þá stiga og klifruðu yfir hlið í portinu,“ segir hann.

Tjaldið umdeilda var síðan tekið niður. Lögreglumennirnir fylgdust með að sögn Einars Sturlu enda hleypti hann þeim í gegnum veitingastaðinn.

Magnús Sædal segir ekki hafa verið sótt um leyfi fyrir tjaldinu og að fyrir því sé ekki nauðsynlegur byggingarreitur. „Þá þyrfti að kynna þetta fyrir nágrönnum og ég er ansi hræddur um að það yrði þungur róður enda veldur þetta hávaða í umhverfinu,“ segir byggingarfulltrúinn.

Einar Sturla segir málinu ekki lokið. „Við erum að teikna upp tjaldið og ætlum að sækja um bráðabirgðaleyfi.“

gar@frettabladid.is