Tólf manns á Íslandsskrifstofu ESB

Ríkisstjórnin staðfesti í gær samning um stofnun sendinefndar Evrópusambandsins á Íslandi.

Í samningnum er fjallað um lögformlega stöðu sendinefndarinnar og margvíslegar heimildir hennar. Þá er kveðið á um að hún skuli njóta þeirra réttinda, forréttinda og friðhelgi, og vera bundin af þeim skyldum, sem Vínarsamningurinn um stjórnmálasamband kveður á um.

Samkvæmt upplýsingum Fréttablaðsins er stefnt að því að tólf starfsmenn verði á skrifstofu sendinefndar ESB á Íslandi. Að líkindum verða sjö þeirra fastráðnir starfsmenn sambandsins í Brussel en fimm verða ráðnir á Íslandi.

Leitað er að húsnæði fyrir nefndina, sem helst vill vera í miðborg Reykjavíkur, nærri helstu stjórnsýslubyggingum.

Nefndin tekur til starfa á Íslandi í byrjun nýs árs. Yfirmaður hennar og sendiherra Evrópusambandsins verður Timo Summa, sem verið hefur starfsmaður á stækkunarskrifstofu þess. Er hann Finni eins og yfirmaður hans hjá ESB, Olli Rehn.

Evrópusambandið starfrækir sendiráð eða -nefndir í um 130 ríkjum heimsins. Ísland hefur til þessa heyrt undir sendiráð þess í Ósló en stofnað er til starfseminnar hér nú í ljósi aðildarumsóknar Íslands. - bþs