Ítrekaði fyrri beiðni um afsögn Óskars

Ólafur F. Magnússon, borgarfulltrúi F-listans, ítrekaði á fundi borgarstjórnar í dag kröfu sína um að Óskar Bergsson, borgarfullrúi Framsóknarflokksins, segi af sér og upplýsi um hagsmunatengsl sín við byggingarverktaka og aðra hagsmunaaðila.

Óskar: Vegið að starfsheiðri mínum

Í umræðum sagði Óskar að vegið væri að starfsheiðri sínum þegar hann væri sagður vera handbendi verktaka. Hann sagði Ólaf vera kominn hressilega yfir strikið í yfirlýsingum sínum. Langur vegur væri frá því að kjörnir fulltrúar væru að misnota aðstöðu sína.

Ólafur fór jafnframt fram á að Óskar upplýsti um öll framlög sem hann hafi þegið í kosningasjóði sína. ,,Nýlega bárust upplýsingar um grófa misbeitingu borgarfulltrúans í starfi sínu sem formaður borgarráðs, meðal annars með sérstökum veislum fyrir vini og samstarfsfólk í Framsóknarflokknum. Minnt er á að þurfi að borgarfulltrúinn að víkja úr borgarstjórn vegna þeirrar spillingar sem hann hefur nú þegar orðið uppvís að auk annarra misbeitingar sem í rannsókn sem kann að koma í ljós er meirihluti Framsóknarflokks og Sjálfstæðisflokks fallinn," segir í bókun sem Ólafur lagði til á fundinum.

Fjöðurinn sem býr til hænuna

Óskar starfaði eitt sinn hjá verktakafyrirtækinu Eykt. Í umræðunum í dag sagði Óskar að bakgrunnur sinn væri í byggingariðnaði. ,,Það er fjöðurinn sem býr til hænuna í málflutningi borgarfulltrúa Olafs F. Magnússonar."

Óskar sagðist þreytast umræða um meinta spillingu Framsóknarflokksins. ,,Það er nóg að segja lygina nógu oft og þá fer fólk að trúa því."