Vill opinbera rannsókn á hagsmunatengslum Óskars

Ólafur F. Magnússon, borgarfulltrúi F-lista, hyggst leggja fram á næsta borgarstjórnarfundi tillögu um að fram fari opinber rannsókn á hagsmunatengslum Óskars Bergssonar, formanns borgarráðs, við byggingarverktaka í borginni.

Ólafur segir að Óskar hafi að undanförnu orðið uppvís að grófri misbeitingu starfs síns sem formaður borgarráðs. Auk þess hafi komið fram fjöldi ásakana og vísbendinga um að Óskar hafi gengið erinda byggingarverktaka, sem hann hafi tengsl við, á kostnað borgarbúa.

Meirihlutinn víkur sér undan óþægilegum spurningum

Fram kemur í tilkynningu frá Ólafi að hann hafi lagt fram fyrirspurn í borgarráði í morgun en Óskar hafi slitið fundi á meðan að verið var að ganga frá fyrirspurninni. Ólafur segir óljóst hvort að fyrirspurnin verði færð til bókar en ljóst sé að meirihlutinn víki sér undan því að svara óþægilegum spurningum. Þessi mál verði því á dagskrá næsta borgarstjórnarfundar.

Fyrirspurn Ólafs:

,,Að undanförnu hefur verið greint frá því í fjölmiðlum m.a. í þættinum Silfur Egils í RÚV að Reykjavíkurborg hafi gert skuldbindandi leigusamninga við byggingarfélagið Eykt fyrir milljarða króna. Fullyrt var í þættinum að þessi milljarðaútgjöld sem og aukning á byggingarmagni á Höfðatorgsreit væru hluti af samkomulagi í kjölfar meirihlutamyndunar Framsóknarflokks og Sjálfstæðisflokks vorið 2006.

Því er spurt:

1. Hvenær var ákvörðun tekin um skuldbindandi leigusamning fyrir milljarða króna og aukið byggingarmagn á Höfðatorgsreit?

2. Hver var aðkoma þáverandi borgarfulltrúa og varaborgarfulltrúa Framsóknarflokksins, þeirra Björns Inga Hrafnssonar og Óskars Bergssonar, að þessum málum?

3. í hvaða ráðum og nefndum borgarinnar sátu þessir sömu kjörnu fulltrúar Framsóknarflokksins á fyrra valdatímabili Framsóknarflokks og Sjálfstlæðisflokks í borginni og hvaða stöðu sköpuðu þessar nefndasetur fyrir fulltrúa Framsóknarflokksins til að hafa áhrif á framgang þessa dýra leigusamnings, sem og að hafa áhrif á aukið byggingarmagn á Höfðatorgi?

4. Nauðsynlegt er að upplýst verði hvaða byggingarverktakar á höfuðborgarsvæðinu hafa verið vinnuveitendur Óskars Bergssonar eða eru í nánum perónulegum tengslum við borgarfulltrúann? Vill borgarstjóri svara þeirri spurningu eða telur hann það ekki í sínum verkahring? Ef svo er þá hlýtur undirritaður að krefjast þess að fram fari opinber rannsókn á tengslum Óskars Bergssonar við byggingarverktaka í borginni, enda hafa ýmsir haldið því fram að sumir kaup- og leigusamningar á lóðum, sem borgin hefur heimilað séu "gersamlega út í hött" og að spor Óskars liggi langt aftur í þeim efnum. Miðað við grófa misbeitingu hans á starfi formanns borgarráðs að undanförnu verður að upplýsa þessi mál öll og áðurnefnd hagsmunatengsl hans."