Fjölmörgum snjóbrettum stolið

Töluvert er um að snjóbrettum sé stolið þessa dagana. Að undanförnu hafa lögreglu borist margar slíkar tilkynningar, flestar ef ekki allar úr Bláfjöllum.

„Þar hafa óprúttnir aðilar verið á ferð en þeir virðast nota tækifærið á meðan snjóbrettafólkið hvílir lúin bein og borðar nestið sitt. Allmörg snjóbretti hafa horfið með þessum hætti og því er full ástæða til að vera betur á varðbergi," segir í tilkynningu frá lögreglu.

Lögreglan hvetur foreldra og foráðamenn til að brýna fyrir börnum sínum mikilvægi þess að passa vel upp á hlutina sína. „Hinir sömu eru jafnframt beðnir um að láta lögreglu vita ef vart verður við illa fengin snjóbretti."