Sextán ára stúlka drakk sig í hel

Yfirvöld í Bretlandi hafa sent aðvörun sem sérstaklega er beint til unglinga eftir að sextán ára gömul stúlka drakk sig í hel innflutningspartýi vinar síns.

Rhona Taverner var fyrirmyndarnemandi með A í öllum fögum.

Hún var síður en svo drykkfelld en í umræddu samkvæmi er talið að hún hafi drukkið um hálfan lítra af Vodka.

Þegar hún virtist deyja áfengisdauða ákváðu vinir hennar að keyra hana heim. Þeir hringdu til foreldra hennar til að segja þeim að Rhona hefði drukkið of mikið og þeir væru að koma með hana.

Rétt þegar komið var að húsinu gerðu vinirnir sér grein fyrir að hún var hætt að anda. Þá var bíllinn stöðvaður og lífgunartilraunir hafnar. Jafnframt var hringt á sjúkrabíl.

Á sjúkrahúsinu úrskurðuðu læknar að Rhona væri heiladauð. Hjarta hennar hefði stöðvast vegna áfengismagnsins og heilinn liðið slíkan súrefnisskort að hann hefði hætt að starfa.

Fjórum dögum síðar létu foreldrar hennar slökkva á öndunarvélinni sem hélt henni á lífi.

Dánardómstjóri úrskurðaði að Rhona hefði látist af slysförum. Hann hafði skilaboð til þeirra sem voru viðstaddir dómsúrskurðinn en meðal þeirra voru margir af vinum Rhonu.

-Áfengi er eitur og ef þið drekkið nóg af því þá deyið þið. Það skiptir ekki máli hver þið eruð, hversu stór þið eruð eða hvort þið drekkið reglulega eða sjaldan. Áfengi drepur.