Íslenskir karlar verða elstir norrænna karla

Áætlaður lífaldur Íslendinga er sá hæsti á Norðurlöndum. Þetta á þó einungis við um karla en íslenskar konur verða næstum jafn gamlar og sænskar kynsystur þeirra. Áætlaður meðallíftími nýfædds drengs á Íslandi er 79,6 ár og er það norrænt met. Þetta kemur fram í Norrænum hagtölum þar sem teknar eru saman samanburðartölur um norrænu ríkin fimm auk Færeyja, Grænlands og Álandseyja. Finnskir og danskir karlar verða að jafnaði 76,3 ára sem er stysti lífaldur á Norðurlöndum.

Meðallíftími grænlenskra karla er þó enn skemmri, hann var á árinu 2007 aðeins 66,3 ár. Þá kemur fram að íslenskir karlar reyki lítið því áttatíu prósent þeirra reykja ekki. Sænskir karlar reykja þó enn minna, því hlutfall karla sem ekki reykja í Svíþjóð er 87 prósent. Þá má nefna að Jón er vinsælasta nafnið sem nýfæddum drengjum er gefið á Íslandi. Annars staðar á Norðurlöndum, eða í Danmörku, Svíþjóð og Noregi, er Lucas vinsælast.