Heimir: Þeir eiga báðir eftir að hjálpa okkur mikið

ÍBV tilkynnti formlega á blaðamannafundi í dag að Tryggvi Guðmundsson og Ásgeir Aron Ásgeirsson muni spila með ÍBV næsta sumar en ljóst er koma leikmannana er mikill happafengur fyrir Eyjamenn.

„Þetta er strákar sem eiga báðir eftir að hjálpa okkur mjög mikið að mínu mati. Tryggvi með reynslu sinni og getu og Ásgeir Aron er mjög fjölhæfur og góður leikmaður sem getur leyst margar stöður á vellinum sem er mjög mikilvægt fyrir lið með þunnan leikmannahóp eins og við höfum verið með undanfarið," sagði Heimir Hallgrímsson, þjálfari ÍBV, í viðtali við Vísi.

ÍBV tók ákvörðun um það fyrir síðasta tímabil að leggja allt sitt traust á unga og efnilega Eyjapeyja og Heimir telur að það eigi eftir að hjálpa liðinu mjög mikið þegar til lengra tíma sé litið. Hann telur hins jafnframt að tilkoma Tryggva og Ásgeirs Arons eigi eftir að hjálpa þessum ungu strákum að taka næsta skrefið.

„Til þess að þessir strákar, sem voru að stíga sín fyrstu skref síðasta sumar, haldi áfram að taka framförum er mikilvægt að þeir fái að spila með ef til vill sér betri og reyndari leikmönnum og ég hef trú á því að Tryggvi og Ásgeir Aron eigi eftir að hjálpa liðinu mjög mikið. Það er heldur ekki verra að þeir séu báðir með mikla tengingu til Vestmannaeyja," sagði Heimir ánægður.