Tryggvi: Er stoltur að fá að taka þátt í þessu verkefni

„Ég hef oft hugsað um að snúa aftur heim til Vestmannaeyja og núna kom þetta upp og gekk nokkuð fljótt fyrir sig bara. Þetta er virkilega spennandi því ég hef alltaf fylgst vel með því hvað hefur verið að gerast hjá ÍBV og núna finnst mér eins og menn séu að setja stefnuna hátt og jafnvel hærra en síðustu ár og það er sannur heiður að þeir hafi leitað til mín.

Ég er stoltur að fá að taka þátt í þessu verkefni með þeim," sagði Tryggvi Guðmundsson sem skrifaði í dag undir þriggja ára samning við ÍBV en hann er uppalinn Eyjapeyi og spilaði síðast með liðinu árið 1997 þegar það varð einmitt Íslandsmeistari.

Tryggvi viðurkennir að það hafi þó ekki verið auðveld ákvörðun að yfirgefa FH eftir gæfurík ár í Krikanum.

„Ég átti náttúrulega fimm frábær ár með FH og vann fimm stóra titla og það verður ekki toppað. Svona er nú fótboltinn samt og það kemur alltaf eitthvað nýtt upp á og mér fannst þetta dæmi með ÍBV bara vera mjög spennandi og vildi því taka þátt í því. En ég kveð FH náttúrulega mjög sáttur og það er allt í góðu okkar á milli og það er ánægjulegt," sagði Tryggvi í viðtali við Vísi en nánara viðtal við Tryggva birtist í Fréttablaðinu á morgun.