Ríkisendurskoðun telur brot yfirlæknis HSA vera alvarleg

Ríkisendurskoðun telur að í starfi yfirlæknis Heilbrigðisstofnunar Austurlands (HSA) hafi verið alvarlegar brotalamir. Í 26 tilvikum hafi hann krafist of hárrar þóknunar fyrir vinnu sína. Þá hafi einnig verið brotalamir á lögboðinni færslu í sjúkraskrá. Þrátt fyrir það mun ríkisendurskoðun ekki aðhafast frekar í málinu.

Stofnunin hvetur hins vegar heilbrigðisráðuneytið til að „ganga rækilega úr skugga um hvaða úrræðum viðeigandi sé að beita í þessu máli“ líkt og segir í bréfi hennar til ráðuneytisins.

Heilbrigðisráðherra, Álfheiður Ingadóttir, segir að brugðist verði við þessari hvatningu ríkisendurskoðunar. „Ráðuneytið mun verða við þessu. Það verður kannað til hvaða úrræða þarf að grípa,“ segir ráðherra.

Álfheiður segir að jafnframt hafi verið ákveðið að verða við ósk bæjarráðs Fjarðarbyggðar um að fenginn verði sjálfstætt starfandi úttektaraðili til að ræða við starfsmenn og stjórnendur um starfsumhverfið. „Ráðuneytið er að kanna, í framhaldi af þessum tilmælum ríkisendurskoðunar, hver staðan er. Markmiðið er auðvitað að finna lausn sem allir geta sætt sig við,“ segir Álfheiður.

Yfirlækninum, Hannesi Sigmarssyni, var vikið tímabundið frá störfum í febrúar. Þá hófst rannsókn á vinnulagi Hannesar og meintum fjárdrætti. Ríkisendurskoðun kemst að þeirri niðurstöðu að í 26 tilvikum hafi Hannesi „verið eða mátt vera ljóst að hann ofkrafði HSA um þóknun fyrir vinnu sína“, segir í bréfi stofnunarinnar.

Lögreglurannsókn fór fram en 30. september var ákveðið að kæra ekki. Frestur til að áfrýja þeirri ákvörðun rennur út um mánaðamótin.

Einar Rafn Haraldsson, forstjóri HSA, sagðist ekki vilja tjá sig um framhaldið fyrr en viðbrögð hefðu borist frá ráðuneytinu. Eftir stæði að læknirinn hefði fengið ofgreitt fyrir vinnu sína.

Þess má geta að Persónuvernd hefur nú afturkallað leyfi sem stofnunin hafði í janúar síðastliðnum veitt Hannesi og öðrum lækni á heilsugæslunni til að nota sjúkraskrár í rannsókn á starfsemi heilsugæslunnar. Hannes hafði sjálfur skrifað upp á heimild til notkun sjúkraskránna fyrir hönd heilsugæslunnar. Í reynd var það lækningaforstjórinn sem átti að veita slíkt samþykki. Lækningaforstjórinn gerði síðar athugasemd við Persónuvernd sem afturkallaði leyfið eftir að hafa skoðað málavexti.

kolbeinn@frettabladid.is

gar@frettabladid.is