McLeish: Svona atvik eru skömm fyrir fótboltann

Knattspyrnustjórinn Alex McLeish hjá Birmingham var afar ósáttur með vítaspyrnudóminn sem leiddi að jöfnunarmarki Liverpool í 2-2 jafntefli liðanna á Anfield-leikvanginum í kvöld.

Dómarinn Peter Walton dæmdi víti eftir tæklingu miðjumannsins Lee Carsley hjá Birmingham á framherjann David Ngog hjá Liverpool en endursýning á atvikinu sýndi bersýnilega að engin snerting átti sér stað á milli leikmannanna.

Walton dæmdi engu að síður víti og Steven Gerrard fór á punktinn og skoraði af öryggi og jafnaði leikinn 2-2.

„Svona atvik eru skömm fyrir fótboltann. Walton er mjög góður dómari en í þetta skiptið urðu honum á mistök og það er mjög svekkjandi þegar leikmaður kemst upp með að blekkja dómarann. Ef ekki hefði verið fyrir vítaspyrnudóminn er ég sannfærður um að við hefðum náð að vinna leikinn," sagði McLeish í leikslok í kvöld.