Myntsamstarf ólíkleg framtíðarlausn

Gylfi Magnússon, viðskiptaráðherra, telur myntsamstarf við Norðmenn ólíklega framtíðarlausn fyrir Íslendinga. Tveir norskir ráðherrar eru jákvæðir fyrir myntsamstarfi þjóðanna.

Steingrímur J. Sigfússon, fjármálaráðherra og formaður Vinstri grænna, sagði á blaðamannafundi í hádeginu að hann væri ánægður með undirtektir fjármála- og samgönguráðherra norsku ríkisstjórnarinnar við hugmyndir um samstarf þjóðanna. Upptaka norsku krónunnar er einn af þeim fjórum leiðum sem Íslendingar standi frammi fyrir hvað gjaldeyrismál varðar, að mati Steingríms.

Gylfi segist ekki hafa náð að fylgjast nægjanlega vel með til að vita hvað felist í boði Norðmanna. „Mér finnst allt í lagi að skoða með opnum hug eitthvert samstarf við Norðmenn en þó finnist mér það mjög ólíkleg framtíðarlausn fyrir Ísland að taka upp norska krónu. En það getur vel verið að það sé ýmislegt gott hægt að hafa upp úr samstarfi við Norðmenn á þessu sviði," segir Gylfi.

Kristin Halvorsen, fjármálaráðherra Noregs og formaður systurflokks VG, kemur til Íslands um næstu helgi til að taka þátt í 10 ára afmælisfagnaði Vinstri grænna. „Við munum örugglega ræða þetta eins og svo margt annað," sagði Steingrímur á blaðamannafundinum fyrr í dag. Við sama tilefni sagði Jóhanna Sigurðardóttir, forsætisráðherra, að ekki hafi verið fjallað um þessa leið innan ríkisstjórnarinnar. Sjálfri hugnist best upptaka evru samhliða inngöngu í Evrópusambandið.