Ríkisins að tryggja að allir geti sótt sér grunnmenntun

Stjórnvöldum ber að sjá til þess að öll börn og unglingar hafi tök á að sækja sér grunnmenntun. Þetta segir Ragnar Aðalsteinsson hæstaréttarlögmaður, spurður út í fregnir þess efnis að foreldrar hafi ekki sent börn sín í skólann vegna þess að þeir hafi ekki efni á rit­föngum og námsbókum.

„Þar sem skólaskylda ríkir þá á það að vera hluti af framlagi ríkisins að sjá til þess að börnin og fjölskyldur þeirra hafi ekki neinn verulegan kostnað af skólagöngunni, og að sjálfsögðu alls ekki svo verulegan að þau börn sem þannig stendur á um geti ekki staðið jafnfætis öðrum börnum í sínu námi,“ segir Ragnar.

Hins vegar sé ekki víst að eins rík skylda hvíli á ríkinu þegar kemur að framhaldsskólanámi, enda sé það valfrjálst nám.

Hann bendir jafnframt á að ríkisvaldið sé skyldugt til að rökstyðja vel aðgerðir á borð við þær að draga úr framboði á kennslu í skyldunámi, lækka fjárframlög til öryrkja, draga hugsanlega saman í heilbrigðis­þjónustu eða auka kostnað borgaranna við hana. Þegar skref sem þessi séu tekin þurfi að sýna fram á að engin önnur leið hafi verið fær.

„Þeir verða að sýna fram á að ekki verði hjá því komist að skerða efnahagsleg og félagsleg réttindi borgaranna. Þetta eru skref aftur á bak og þess vegna þarf mjög öflugan rökstuðning til þau standist,“ segir hann.stigur@frettabladid.is