Barn sýktist af völdum skógarmítils

Barn á höfuðborgar­svæðinu sýktist nýverið af völdum skógarmítils. Sýkingin greindist í tæka tíð og gengst barnið undir viðeigandi meðferð.

Ef sýking af völdum skógarmítils greinist ekki geta hlotist af alvarleg veikindi. Veiran leggst á taugakerfið og getur skaðað bæði mænu og heila.

Samkvæmt upplýsingum Fréttablaðsins á ekkert af þessu við um tilvikið sem greinst hefur hér; talið er víst að barnið nái sér að fullu.

Erling Ólafsson, skordýrafræðingur hjá Náttúrufræðistofnun Íslands, segir að skógarmítill hafi tekið sér bólfestu á Íslandi með hlýnandi loftslagi. Honum hafi um leið fjölgað mjög annars staðar á Norðurlöndunum. Erling segir að í ljósi aðstæðna hafi aðeins verið tímaspursmál hvenær sýkingartilfelli kæmi upp. Kveðst hann óttast að heilbrigðiskerfið sé almennt ekki búið undir að takast á við þetta nýja vandamál.

Siv Friðleifsdóttir, þingmaður Framsóknarflokks og fyrrverandi heilbrigðisráðherra, deilir þeim áhyggjum með Erling. Hefur hún lagt fram fyrirspurn um málið til heilbrigðisráðherra. „Þetta er vandamál sem er að festa rætur og ég tel mikilvægt að heilbrigðisþjónustan geti greint þau tilvik sem koma upp og almenningur sé á varðbergi," segir Siv.