Menntamálaráðherra kennir í Háskóla unga fólksins

Katrín Jakobsdóttir, menntamálaráðherra, kennir í Háskóla unga fólksins þegar hann hefst á mánudag. Metþátttaka er í skólanum en á fjórða hundrað nemendur eru skráðir í hann.

Nemendur í Háskóla unga fólksins eru á aldrinum 12 til 16 ára og sjá þeir til þess að andinn breytist í Háskóla Íslands svo um munar í heila viku. Hver nemandi velur sex námskeið og eitt þema og setur þannig saman sína eigin stundatöflu. Í skólanum gefst vísindamönnum framtíðarinnar kostur á að kynnast undrum tilverunnar með vísindamönnum Háskóla Íslands sem á móti komast í beint samband við æsku landsins.

Katrín mun kenna nemendum skólans ýmislegt um áhrif íslenskra dægurlagatexta en hún er með meistarapróf í íslenskum bókmenntum.

Háskóli unga fólksins er nú haldinn í sjötta sinn en honum verður slitið á næsta föstudag með veglegri brautskráningarhátíð sem nemendurnir stýra sjálfir.