Niðurrifsmaður á Álftanesi hafði milljónir af fimm manna fjölskyldu

„Hann er ekki hetja í mínum augum," segir Barbara Ósk Guðbjartsdóttir. Hún og maður hennar Viðar Guðmundsson segja farir sínar ekki sléttar af viðskiptum sínum við Björn Braga Mikkaelsson sem þann 17. júní reif niður einbýlishús á Álftanesi. Húsið hafði hann misst í hendur Frjálsa Fjárfestingabankans. Þau Viðar og Barbara greiddu Birni tæpar tíu milljónir króna fyrir finnskt einingahús sem þau fengu aldrei í hendurnar.

Borguðu tíu milljónir fyrir teikningarnar einar

Aðgerðir Björns þann 17. júní hafa vakið upp mismunandi viðbrögð í umræðunni. Fjöldi fólks hefur þó lýst yfir stuðningi við þessar aðgerðir og sumir jafnvel kallað hann hetju. Hetjustimpillinn er eitthvað sem þeim Viðari og Barböru finnst ekki hæfa Birni miðað kynni þeirra af manninum.

Hjónin sem búa í Miðhúsum í Kollafirði ásamt þremur börnum ætluðu að kaupa hús af Birni í gegnum fyrirtækið Sunhouse ehf. Þau borguðu staðfestingargjald árið 2006 upp á 2,7 milljónir. Árið 2007 borguðu þau svo gott sem restina af húsinu eða 7,2 milljónir til viðbótar. Húsið sjálft áttu þau svo að fá afhent síðasta sumar en þá voru þau búin að steypa grunn fyrir húsið. Einhver dráttur varð þó á því að þau fengju einingarnar. Þær skýringar sem þau fengu hjá Birni voru þær að mikill biðlisti væri í verksmiðjunni í Finnlandi.

Ekki króna borist Finnska fyrirtækinu

„Við svo sem vorum alveg róleg því það var náttúrulega þensla og mikið að gera hjá öllum," segir Viðar. Þeim hafi þó farið að finnast þetta „grunsamlega langur tími" svo þau ákváðu að hringja út til Finnlands í fyrirtækið sem framleiðir húsin. „Þá hafði ekki einu sinni komið allur þessi peningur úr fyrri greiðslunni og ekkert úr seinni greiðslunni," segir Viðar sem þá hringdi í félaga sinn sem einnig var að kaupa hús af fyrirtæki Birgis. „Hann var búinn að borga fimm milljónir og það hafði ekki farið króna út af þeirra peningum."

Viðar segir að þegar þarna var komið hafi Björn verið hættur að svara þeim í síma. „En fyrirtækið, það finnska, hringdi í hann og þá sagði hann bara við þá að þetta væri einhver misskilningur og hann ætlaði bara að hafa samband við okkur sem hann náttúrulega gerði aldrei. Eftir það þá svaraði hann þeim ekkert í síma heldur."

Hefði getað byggt tvö hús

Þau Viðar og Barbara voru sem fyrr segir búin að gera grunn að húsinu og allt klárt fyrir komu hússins. „Svo poppaði gengið svoleiðis í hæstu hæðir að það var ekkert í dæminu að kaupa þetta hús. Við gáfum þetta upp á bátinn og fórum bara að byggja á staðnum og erum að byggja," segir Viðar. Hann segir nógu dýrt að standa í húsbyggingu þó svo að ekki sé byrjað með tíu milljónur í mínus. Hann telur að húsið sem hann er að byggja nú á grunninum þar sem húsið frá Birni átti að rísa, komi til með að kosta um 20 milljónir. „Það skulda ég plús hitt. Kostnaðaráætlun á hinu var svona átján milljónir fullklárað ef að þessar greiðslur hefðu gengið út á þessu góða gengi sem að var þegar við borguðum," segir Viðar og bætir við að hann sé í raun að kaupa tvö hús.

Kærðu Björn og Sunhouse til lögreglu

Þau Viðar og Barbara kærðu Björn og fyrirtækið Sunhouse ehf. til lögreglu. Björn tapaði hinsvegar húsi sínu í nóvember og snemma á árinu óskaði Sunhouse ehf. eftir því að verða tekið til gjaldþrotaskipta. „Þannig að við vorum náttúrulega mjög svartsýn á að fá nokkurn pening en þetta er bara hjá lögreglu," segir Viðar sem á til öll gögn um þessi viðskipti.

„Mér finnst allt í lagi að það komi fram þessi hlið málsins því að fólk vorkennir honum alveg ægilega," segir Viðar. „Svo talaði hann um þarna í gær í viðtalinu að hann væri að gjalda líku líkt. Bankinn væri að henda honum út og þá hafi hann rutt niður húsinu. Það væri nú fróðlegt hvernig honum finndist að ég ætti að gjalda honum? Ég væntanlega ætti þá bara að urða hann með gröfu samkvæmt þessum réttlætisstöðlum sem hann fer eftir," segir Viðar sem hyggur þó á að fara „siðferðislega betri leiðir."

„Eins talaði hann um í gær að hann hefði lent í þremur slæmum kúnnum og þess vegna hefði þetta húsafyrirtæki hans hvolft. Ég hlýt nú að hafa talist góður kúnni - gaf honum tíu milljónir," segir Viðar.

Hefur þú átt viðskipti við Björn? Hafðu samband í síma 512-5203 eða á netfangið ritstjorn@visir.is