Barnalán á gjalddaga sama ár og Icesave afborganir

Tiltölulega stór lán eru á gjalddaga árið 2016, sama ár og afborganir af Icesave láninu eiga að hefjast. Um er að ræða lán í tvennu lagi frá árunum 1981 og 1983 að upphæð fimmtán milljónir punda í hvort skipti, alls þrjátíu milljónir.

Lánin voru tekin í ríkisstjórnartíð Gunnars Thoroddsen í efnahagsþrengingum 9. áratugarins og voru uppnefnd barnalánin, þar eð börn þeirra sem tóku þau kæmu til með að greiða af þeim.

Útefandi lánsins er Royal Bank of Scotland samkvæmt Seðlabanka Íslands, en breski bankinn Hambros hafði milligöngu um það. Í frétt Morgunblaðsins frá janúarmánuði 1981 er raunar sagt frá að ýmsir lífeyrissjóðir og tryggingafélög í Bretlandi hafi lánað féð. Það hafi verið í fyrsta sinn síðan 1968 sem Ísland sló lán í sterlingspundum.

Lánið ber 14,5 prósent vexti sem greiddir eru árlega, en lánið er í fullum skilum. Það merkir að á gengi dagsins í dag eru árlegar vaxtagreiðslur lánsins meira en 900 milljónir. Lánasamningurinn er ekki uppsegjanlegur og því hefur það ekki verið endurfjármagnað á hagstæðari vaxtakjörum.

Lánið er þó ekki verðtryggt, svo verðmæti þess minnkar með hverju árinu, eftir því sem verðbólga er ufram veikingu krónunnar, eða krónan styrkist.

Afborgunin árið 2016 kemur því til með að nema um 7,1 milljarði króna á gengi dagsins í dag.

Aðspurður segir Indriði H. Þorláksson, aðstoðarmaður fjármálaráðherra, að ekki hafi verið gerðar sérstakar ráðstafanir vegna lánsins.

„Þetta lán er ekki mjög stór hluti heildarskulda ríkissjóðs," segir Indriði og segir líklegt að það verði greitt upp til að losna undan vaxtagreiðslunum.