Kafbátaferðir hafa ekki verið ræddar við rússnesk stjórnvöld

Utanríkisráðherra hefur ekki rætt umferð rússneskra kafbáta við Ísland við rússnesk stjórnvöld eða fulltrúa þeirraa, samkvæmt upplýsingum sem fréttastofa hefur frá utanríkisráðuneytinu.

Greint var frá því í fjölmiðlum um helgina að rússneskur kafbátafloti hefði verið við Ísland í síðustu viku og að áhugi þeirra virtist einkum beinast að Drekasvæðinu þar sem talið er að hægt sé að finna olíu.

„Þetta hefur ekki verið tekið upp við rússnesk yfirvöld enda er okkur ekki kunnugt um að rússneskir kafbátar hafi sést innan íslenskrar lögsögu. Það verður áfram fylgst með þessum ferðum," segir Urður Gunnarsdóttir, upplýsingafulltrúi utanríkisráðuneytisins, við fyrirspurn fréttastofu um málið.