Raforkuverð sligar bændur að óbreyttu

Fjöldi garðyrkjubænda horfir fram á alvarlega rekstrarerfiðleika vegna hækkunar á raforkuverði. Gjaldþrot vofir yfir stórum fyrirtækjum ef ákvörðun stjórnvalda um skerðingu á niðurgreiðslum verður látin standa óbreytt. Skerðingin skilar ríkissjóði litlum ávinningi en veldur gríðarlegu tjóni, segir Bjarni Jónsson,framkvæmdastjóri Sambands garðyrkjubænda.

Bjarni segir að raforkukostnaður fjölda garðyrkjubænda hafi hækkað um 25 prósent með ákvörðun stjórnvalda í ársbyrjun um að skerða niðurgreiðslur á dreifingarkostnaði rafmagns. „Ég vona, framleiðslunnar vegna, að það verði tekið á þessu máli og þessari ákvörðun snúið við." Bjarni minnir á að nýleg hækkun á gjaldskrá Landsvirkjunar þýði að raforkuverð bænda í dreifbýli hafi hækkað um allt að 35 prósent.

„Mesta hækkun sem ég hef séð hjá einum bónda er 600 þúsund krónur á mánuði. Þetta er rekstur sem hefur skilað lítils háttar hagnaði og það þarf ekki marga mánuði með svona aukareikningum til að knésetja fyrirtæki. Gleymum því heldur ekki að á undanförnum átján mánuðum hafa öll aðföng hækkað gríðarlega."

Atli Gíslason, formaður landbúnaðar- og sjávarútvegsnefndar Alþingis, telur að unnið sé að lausn málsins innan landbúnaðarráðuneytisins, án þess að hún sé í sjónmáli. „Þetta virðist mjög þungt í vöfum. Við erum að selja orku til álbræðslna undir kostnaðarverði, liggur mér við að segja, og það bitnar á garðyrkjubændum og öllum almenningi í landinu. Við erum að borga niður verðið til álfyrirtækjanna og þar liggur stóri vandinn í orkumálum."

Samband garðyrkjubænda skrifaði undir samkomulag við stjórnvöld í júlí um breytingar á gildandi samningi um starfs­skilyrði garðyrkjubænda. Þar kveður á um að starfshópur muni skoða hækkun raforkuverðs. Bjarni hvetur til þess að starf hópsins hefjist sem fyrst svo taka megi á þeim vanda sem fyrir­sjáanlegur er hjá fjölda bænda.

Fjöldi fyrirtækja verður harka­lega fyrir barðinu á hækkun orkuverðs og þeirra á meðal eru stærstu fyrirtækin í geiranum. Margir geta ekki mætt svona áföllum. Gleymum heldur ekki hvað þetta þýðir fyrir sveitarfélög, til dæmis á Suðurlandi, ef ekkert verður gert. Þar eru þessi fyrirtæki burðarásinn og skila stórum hluta skatttekna þeirra," segir Bjarni.