Albert: Ég man ekki eftir því að hafa klárað leikinn

Markvörðurinn Albert Sævarsson hjá ÍBV lenti í óskemmtilegu atviki í uppbótartíma í leik gegn sínum gömlu félögum í Grindavík í Pepsi-deildinni í gærkvöld þegar hann og framherjinn Gilles Ondo skullu saman.

Albert fékk skurð á höfuðið og vankaðist en það stoppaði hann þó ekki við að klára síðustu mínúturnar í leiknum en hann sjálfur er ekki beint besti vitnisburðurinn um það.

„Tja, svo segja þeir. Ég man sjálfur ekki eftir því að hafa klárað leikinn og hef ekki hugmynd um hvað gerðist. Ég rankaði bara við mér inni í klefa. Það var svo farið með mig upp á sjúkrahús þar sem ég var saumaður.

Ég vildi reyndar ekkert fara þangað þar sem ég ætlaði mér að fara austur á firði á hreindýraveiðar strax eftir leik. Mér var hins vegar ráðlagt að fresta því um einn dag, sem ég og gerði," útskýrir Albert í samtali við Vísi í dag.