Ísland ekki á dagskrá hjá AGS í næstu viku

Fyrsta endurskoðun á áætlun Íslands verður ekki tekin fyrir í framkvæmdastjórn Alþjóðagjaldeyrissjóðsins í Washington þann 14. þessa mánaðar þrátt fyrir að svo segi í dagskrá AGS á vefnum. Tómas Brynjólfsson á efnahags- og alþjóðafjármálaskrifstofu forsætisráðuneytisins staðfestir þetta í samtali við Vísi.

Sú vinna sem inna þarf af hendi áður en framkvæmdastjórnin tekur málið fyrir er að sögn Tómasar ekki komin nægilega langt til þess að mögulegt væri að klára það fyrir 14. september. Hann segist hins vegar vonast til þess að málið fari fyrir framkvæmdastjórnina fyrir mánaðarmót.

Að sögn Tómasar er ekki ljóst hvers vegna Ísland var sett á dagskrá framkvæmdastjórnarinnar á netinu en þar er raunar skýrt tekið fram að um bráðabirgðadagskrá sé að ræða.

Annar hluti lánsins sem AGS hefur veitt Íslendingum verður ekki greiddur út fyrr en endurskoðun hefur farið fram á áætluninni og hefur Icesave-deilan meðal annars komið í veg fyrir að málið kæmist á dagskrá.