Réttað yfir Fillipseyja-genginu

Aðalmeðferð í máli ríkissaksóknara gegn ofbeldisgengi Filippseyinga fer fram í héraðsdómi í dag. Alls eru átta ákærðir en þeir réðust að tveimur lögreglumönnum og veittu þeim áverka.

Átta manns tóku þátt í árás á tvo lögreglumenn í Hraunbæ í október síðastliðnum. Um var að ræða gengi Filippseyinga sem komu meðal annars við sögu í endurteknum átökum hópa í Breiðholti árið 2003. Að auki var einstaklingur í hópnum frá Nepal. Menn úr hópnum hafa margoft komið við sögu lögreglu hér á landi, einkum vegna ofbeldisbrota. Sumir mannanna eru íslenskir ríkisborgarar en þeir eru á þrítugs- og fertugsaldri. Lögreglumennirnir höfðu farið í hús í Hraunbæ þar sem kvartað hafði verið undan hávaða. Þar ræddu þeir við húsráðendur og yfirgáfu síðan húsnæðið.

Einn úr hópnum veitti þeim þá eftirför og réðst á þá. Þegar þeir ætluðu að handtaka manninn réðust sex félagar hans á þá og létu högg og spörk dynja á þeim. Annar lögreglumaðurinn sem er kona var með kylfu og úða. Hinn lögreglumaðurinn sem er afleysingamaður var ekki með réttindi til að bera kylfu og úða þar sem hann hafði ekki lokið prófi. Hann hlaut skurð á höfði sem þurfti að sauma saman. Báðir lögreglumennirnir fengu skrámur og mar eftir átökin.

Þeir voru bornir ofurliði í átökunum en náðu að ýta á neyðarhnapp á talstöð og barst þeim liðsauki nokkrum mínútum síðar en þá voru árásarmennirnir flúnir. Lögregla hafði upp á sjö þeirra en sá áttundi gaf sig fram stuttu síðar. Samtals voru tólf manns færðir á lögreglustöð vegna málsins. Aðalmeðferð fer fram í dag í Hérðasdómi Reykjavíkur en átta aðilar voru ákærðir.