Sóknarmarkskerfið hefur reynst illa

Sóknarmarkskerfið sem notað er við stjórnun fiskveiða í Færeyjum hefur ekki skilað þeim árangri sem til var ætlast. Þetta kom fram í erindi Hjalta í Jákupsstovu frá Havstofunni á ráðstefnu um skilvirka fiskveiðistjórnun sem nýlokið er í Reykjavík. Havstofan er hafrannsóknastofnun Færeyja.

Hjalti sagði í erindi sínu að offjárfesting, slæm afkoma sjávarútvegsins og bágt ástand mikilvægra fiskistofna, einkum þorsks, þar sem veiðin hefur hrunið á síðustu árum, sé sú mynd sem blasi við Færeyingum.

Hjalti sagði ekki hafa gengið að ná sátt um aflamarkskerfi og því hefði verið tekið upp núverandi stjórnkerfi veiðanna, sem allir sjómenn og útgerðarmenn hefðu á sínum tíma viljað.

Eina af alvarlegustu afleiðingum sóknarmarkskerfisins í Færeyjum taldi Hjalti vera þá, að stýring í sókn ákveðinna tegunda hefði mistekist.

Hjalti sagði að helstu kostir núverandi kerfis væru þeir að reglum væri betur fylgt og brottkast væri minna. Gallarnir vegi hins vegar þyngra. Veiðiheimildir hefðu dregist saman samfara offjárfestingu í öflugri skipum með tilheyrandi tæknivæðingu og aukinni afkastagetu, sveiflur í afla væru miklar og rekstur sjávarútvegsfyrirtækja væri óarðbær. - shá