Ákærður fyrir að smána Kína

Ríkissaksóknari hefur ákært 27 ára gamlan Tékka, Jan Jirícek, fyrir að sletta rauðri málningu á tröppur kínverska sendiráðsins fyrir rúmu ári.

Hann er ákærður fyrir að hafa smánað erlenda þjóð og erlent ríki opinberlega, en til vara fyrir að hafa valdið skemmdum á sendiráðssvæði.

Jirícek játaði sök en taldi brotið ekki varða við umrædd lagaákvæði. Refsing fyrir brot af þessu tagi er sekt eða allt að tveggja ára fangelsi. Jirícek sagðist á sínum tíma með athæfinu vilja mótmæla mannréttindabrotum Kínverja í Tíbet. - sh