Ökuníðingurinn hefur áður haft samband við fréttastofu - myndir

Maðurinn sem gekk berserksgang í gærkvöldi og reyndi meðal annars að aka niður lögreglumenn er enn í haldi lögreglu en yfirheyrslur yfir manninum eru ekki hafnar. Maðurinn ók meðal annars á dyr slökkviliðsstöðvarinnar í Skógarhlíð og var valdur að stjórtjóni. Maðurinn hafði skömmu áður hringt á Fréttastofu Stöðvar 2 og Vísis og hótað að myrða lögreglumenn sem yrðu á vegi hans.

Að sögn lögreglu vinna menn nú að því að safna gögnum um málið en ákvörðun um hugsanlegt gæsluvarðhald verður tekin síðar í dag. Maðurinn hefur áður haft samband við fréttastofu þar sem hann hafði upp svipaðar hótanir.

Maðurinn hafði samband við fréttastofu síðasta sumar þar sem hann sagði meðal annars hafa orðið fyrir ofbeldi lögreglumanna. Hann sagðist þá einnig hafa orðið uppvís að því að reykja gras og væri öryrki eftir ofbeldi lögreglunnar. Maðurinn hafði svipaða sögu að segja í gær og hótaði þá að myrða lögreglumenn sem yrðu á vegi hans.

Lögreglumenn sem komu aðvífandi í gærkvöldi áttu fótum sínum fjör að launa þegar maðurinn keyrði á bíl þeirra. Þá hófst eftirför sem lauk við planið fyrir aftan lögreglustöðina á Hverfisgötu rétt fyrir klukkan níu í gærkvöldi.

Hann hafði þá stórskemmt lögreglubíl sem hann keyrði á, auk þess sem hann hafði gert tilraun til að keyra inn í fjarskiptamiðstöð lögreglunnar við Skógarhlíð. Á leiðinni ók maðurinn á fólksbíl.

Sjúkrabíll reyndi að stöðva manninn með því að keyra á hann, en án árangurs. Maðurinn var loks handtekinn á planinu aftan við lögreglustöðina. Hann var óvopnaður og talinn lítið sem ekkert slasaður.

Hægt er að skoða myndir frá gærkvöldinu með þessari frétt.