Beckham heldur ótrauður áfram

„Mér er sama þó það sé baulað á mig eða ekki, ég held áfram að spila minn leik," segir David Beckham sem ætlar að halda ótrauður áfram með LA Galaxy þrátt fyrir óblíðar móttökur í æfingaleik á dögunum.

Beckham neitar þeim sögusögnum að hann sé að fara að setja hús sitt í Berverly Hills á sölulista. „Það er bara kjaftasaga og það er ekkert til í henni," segir Beckham.

Yfirlýsingar Beckham um að hann vilji vera lánaður frá LA Galaxy í sterkari deild til að auka möguleika sína á landsliðssæti á HM á næsta ári hafa fallið í misjafnan jarðveg hjá stuðningsmönnum Galaxy.

„Það eina sem ég hugsa um er að gera mitt besta á vellinum og á meðan það er nægilega gott fyrir liðið þá er ég sáttur. Það er leiðinlegt fyrir fjölskyldu mína að heyra viðbrögð sumra stuðningsmanna, þeir sýndu mér vissulega óvirðingu og nokkrir fóru vel yfir strikið."