Stefnir Airbus vegna Air France-slyssins

Bandarískur lögmaður hefur stefnt Airbus-flugvélaverksmiðjunum og nokkrum fyrirtækjum sem framleiða hluti í Airbus vélar og krafist bóta vegna dauða átta af þeim farþegum sem fórust í Air France-slysinu 1. júní.

Tæplega 230 manns fórust þegar vél franska flugfélagsins Air France steyptist í Atlantshafið eftir að hafa flogið inn í óveðursský á leið sinni frá Brasilíu til Frakklands. Flugritar vélarinnar fundust aldrei þrátt fyrir að þeirra væri leitað í rúmlega mánuð en talið er að vélin hafi ekki verið í fullkomnu lagi og hafi svokallaðir hraðaskynjarar ekki virkað sem skyldi.

Floyd Wisner heitir lögmaðurinn sem höfðar málið en hann beitir fyrir sig lögum Illinois-ríkis um ranglátan dauðdaga, svonefndum Wrongful Death Act, og höfðar bótamálið fyrir hönd fjölskyldna farþega sem voru frá Ungverjalandi, Argentínu, Frakklandi og fleiri löndum.

Talsmaður Airbus-verksmiðjanna sagði í svari við fyrirspurn Reuters-fréttastofunnar um málið að stefna fyrirtækisins væri að tjá sig ekki um stefnur á hendur því en hjá Honeywell International, sem framleiðir hluti í flugvélar, þar á meðal Airbus, fengust þau svör að engin gögn bentu til þess að nokkur búnaður frá því fyrirtæki hefði verið gallaður á nokkurn hátt. Þar sem stórir hlutar vélarinnar hefðu ekki fundist og ekki flugritarnir heldur væri stefnan algjörlega byggð á getgátum.