AGS kom hvergi nærri ákvörðuninni

Arnór Sighvatsson, aðstoðar Seðlabankastjóri, sagði á fréttamannafundi í dag að Alþjóðagjaldeyrissjóðurinn hafi ekki komið nálægt ákvörðun Seðlabankans um 1% lækkun stýrivaxta, úr 13% í 12%. Mikill þrýstingur hefur verið frá atvinnulífinu á að lækka vexti verulega.

Aðspurðir um lága stýrivaxtalækkun og orsakir hennar fyrir almenning og fyrirtæki í landinu sögðu þeir, Svein Harald Oygard Seðlabankastjóri og Arnór, að mest áhersla væri lögð á stöðugleika íslensku krónunnar. „Við erum að leita að bestu lausninni og þurfum að hugsa til langs tíma," sagði Svein Harald Oygard.

Arnór sagði að stýrivaxtaákvörðunin hafi ekki bein áhrif á vaxtakostnað ríkisins vegna jöklabréfa líkt og Pétur Blöndal, þingmaður Sjálfstæðisflokksins, benti á í samtali við Vísi fyrr í morgun.

Þeir Svein Harald og Arnór, lýstu yfir vonbrigðum sínum með 1,1% hækkun verðbólgunnar í maí mánuði en tólf mánaða verðbólga mælist nú 11,6%.

Þrátt fyrir það telja þeir að 2,5% verðbólgumarkmið bankans muni nást í byrjun næsta árs, meðal annars sökum þess að lækkun fasteignaverðs eigi enn frekar eftir að draga úr verðbólgunni.

Að lokum benti Arnór á alvarleika gjaldeyrishaftanna sem væri margþættur og nefndi mikinn hvata á að fara í kringum höftin. „Við þurfum að byggja upp traust og með þessum aðgerðum teljum við að það muni aukast. Það er mikill skaði af höftunum og sökum þeirra er erfitt að afla fjár til arðbærra framkvæmda, auk þess brjótum við á fjöldamörgun alþjóðasamningum með slíkum höftum og þar af leiðandi er nauðsynlegt að hverfa frá þeim sem fyrst," en Seðlabankinn telur líklegt að afnám haftanna hefjist seint á þessu ári.

Margir vilja meina að með afnámi gjaldeyrishafta muni erlendir krónubréfaeigendur hverfa úr landinu með tilheyrandi lækkun gengis krónunnar sem gæti mjög líklega aukið verðbólgu á nýjan leik.