Ljósmæður funda í Karphúsinu á morgun

Samninganefnd Ljósmæðrafélags Íslands fundar í fyrsta sinn frá því í byrjun mánaðarins í fyrramálið með samninganefnd ríkisins.

Ljósmæður samþykktu um miðjan mánuðinn með ríflega 99% greiddra atkvæða að boða til verkfallsaðgerða í byrjun september til þess að knýja á um betri kjör. Fyrsta verkfallið verður 4. og 5. september en síðan stigmagnast aðgerðirnar og þeim lýkur með allsherjarverkfalli 29. september.

Guðlaug Einarsdóttir formaður Ljósmæðrafélags Íslands segir að hún sé bjartsýn fyrir fundinn. ,,Við vinnum af því að ná samningum sem allra fyrsta áður en það kemur til verkfallsaðgerða," segir Guðlaug og bætir við að verkfallsaðgerðir séu algjört neyðarúræði.

Ljósmæður neituðu að skrifa undir samning sem Bandalag háskólamanna gerði við ríkið í byrjun júlí. Viðræður strönduðu á kröfu ljósmæðra um leiðréttingu á röðun félagsmanna í launatöflu ríkisins. Ljósmæður segja að leiðréttingin sé nauðsynleg til að störf og menntun þeirra verði metin til jafns við stéttir í þjónustu ríkisins með sambærilegan bakgrunn.