Vinstri græn skora á ríkisstjórnina að semja við ljósmæður

Á stjórnarfundi Vinstri grænna í gær var samþykkt ályktun þar sem skorað er á ríkisstjórnina að ganga til samninga við ljósmæður.

Vinstri grænir segja að staðan sem upp sé komin í samningaviðræðum við ljósmæður sé ólíðandi.

Ályktun Vinstri Grænna er birt hér í heild sinni:

Stjórn Vinstri grænna krefst þess að ríkisstjórnin gangi til samninga við ljósmæður.

Neyðarástand skapast á fæðingadeildum landsins innan fárra vikna þar sem fjöldi ljósmæðra hefur sagt upp störfum vegna óánægju með kjör sín. Það er ótrúlegt að enn þurfa kvennastéttir að beita hörku til að fá störf sín metin til launa. Orð stjórnarsáttmála Samfylkingar og Sjálfstæðisflokks um að jafna kjör kynjanna eru innantóm þegar stétt sem telur einungis konur mætir fálátum viðbrögðum við kröfum um að fá svipuð laun og karlastéttir með sambærilega menntun.

Sú staða sem komin er upp í samningaviðræðum við ljósmæður er ólíðandi, bæði gagnvart ljósmæðrum en ekki síður fæðandi konum sem nú eru í óvissu um hvort þær fái nauðsynlega og sjálfsagða þjónustu í mæðraeftirliti og fæðingu. Ríkisstjórnin vanmetur því ekki eingöngu störf ljósmæðra, heldur eru þarfir kvenna einnig virtar að vettugi.

Stjórn Vinstrihreyfingarinnar - græns framboðs krefst þess að ríkisstjórnin semji nú þegar við ljósmæður og forði því að flótti verði úr stéttinni. Enn fremur lýsir stjórn Vinstri grænna yfir stuðningi við ljósmæður og baráttuna fyrir jöfnum launum kynjanna.