Ljósmæður boða verkföll í september

Ljósmæður samþykktu í atkvæðagreiðslu í vikunni að boða til verkfallsaðgerða í byrjun september til þess að knýja á um betri kjör.

Fram kemur í tilkynningu frá Ljósmæðrafélagi Íslands að verkfallsaðgerðir hafi verið samþykktar með 98-99 prósentum greiddra atkvæða. Metþátttaka var í atkvæðagreiðslunni en yfir 90 prósent atkvæðabærra ljósmæðra tóku þátt. Verkföllin beinast gegn sjúkrahúsum, heilbrigðisstofnunum og heilsugæslustöðvum í rekstri ríkisins. Fyrsta verkfallið verður 4. og 5. september en síðan stigmagnast aðgerðirnar og þeim lýkur með allsherjarverkfalli 29. september.

Treysta á að ríkisstjórn geri sér grein fyrir stöðunni

Í tilkynningu ljósmæðra segir að stjórn LMFÍ leggi áherslu á að samningar náist áður en til aðgerðanna komi og treysti á að ríkisstjórn Íslands geri sér grein fyrir alvöru málsins og veiti viðsemjendum umboð til að ná árangri í viðræðum.

„Ábyrgðin liggur hjá ríkinu, við höfum gripið til þess afarkosts sem verkfallsboðun er en kosningin sýnir okkur að ljósmæður standa af heilum hug að baki forystunnar og munu ekki una óbreyttu ástandi" segir Guðlaug Einarsdóttir, formaður félagsins.

Ljósmæður ítreka að þær séu tilbúnar að ganga að samningi sem gerður var við félög innan BHM en vilja hins vegar fá menntun sína og störf metin í samræmi við aðra ríkisstarfsmenn með svipaða menntun. „Þessari kröfu hefur Ljósmæðrafélag Íslands haldið á lofti í mörg ár og eru ljósmæður því langþreyttar á ástandinu," segir í tilkynningunni.

Næsti samningafundur í kjaradeilu LMFÍ og ríkisins er boðaður þann 26. ágúst.